Ang apat Na asawa

                                                                                

 Ang apat na asawa
          Merong Isang hari na may apat na asawa. Mahal niya ang kanyang mga asawa subalit ang pang-apat ang pinakatatangi niya. Ibinibigay niya dito ang pinaka magagandang bagay na meron siya. Ang kanyang pangatlong asawa ang pinaka maganda sa lahat, palagi niya itong ipinagmamalaki sa ibang kaharian. Ang pangalawa naman niyang asawa ang pinaka mabait,pasensyosa at maalalahanin.
SA mga pagkakataon na kinakailangan niyang magdesisyon sa mabibigat na suliranin,ito ang kanyang pinupuntahan upang hingian ng payo. Ang kanyang unang asawa naman ang pinaka matapat sa lahat, ito ang may malaking kuntribusyon upang mapanatili ang kalusugan ng kanyang kamahalan. Subalit hindi ito batid ng hari, at mas madalas pa ngang hindi niya ito pinag uukulan ng pansin.
          Isang araw, nagkasakit ang Hari. Ramdam na niya na ang kanyang pagpanaw ay nalalapit na. Napagtanto niya, "Meron akong apat na asawa, subalit kapag ako'y namatay na,mag isa na lamang ako."

           Ipinatawag niya ang kanyang pang apat na asawa at tinanong, "Ikaw ang pinakamamahal ko, sa aking pagpanaw maaari bang ako'y samahan mo?". Umalis ang babae at walang anumang sinabi, nalungkot ang Hari dahil dito. Tumanggi rin ang kanyang pangatlong asawa at ang wika'y, "Masyadong maganda ang buhay para ako'y mamatay, magpapakasal na lamang ako sa iba kapag ikaw ay wala na."
Nadurog ang puso ng hari dahil sa malamig na pahayag ng babae. Tinanong niya ang kanyang pangalawang asawa at pagkadaka'y sinabi nitong,"Hindi na kita matutulungan sa pagkakataong ito.", nawasak ang pag asa ng hari dahil sa narinig. At Isang boses ang narinig niya na nagsasabing, "Ako...sasamahan kita saan ka man magpunta.". Tumingin ang hari at nakita niya ang ang paghihirap at kalungkutan sa kanyang unang asawa. "Dapat ay mas inalagaan kita nung ako'y may pagkakataon pa." wika ng naghihinagpis na hari.
           Ang katotohanan sa likod ng kwentong ito, ang hari ay sumisimbolo sa isang tao. At ang apat na asawa ay kumakatawan sa kung anong meron sa buhay ng Isang indibidwal. Ang pang apat na asawa ay ang pisikal na katawan ng isang tao. Dahil sa labis Na pagmamahal ng tao dito, ibinibigay niya ang lahat ng mabubuting bagay para dito. Ang ikatlong asawa ay sumisimbolo sa kayamanan o mga bagay na maaaring ipagmalaki ng tao habang ito'y nabubuhay.Mga materyal na bagay o kasikatan na maaaring mapasakamay ng iba. Ang pangalawang asawa ay sumisimbolo sa pamilya at mga kaibigan. Maaari nila tayong matulungan sa panahon ng kagipitan at problema, ngunit sa oras ng kamatayan, sa libing lamang nila tayo maaaring samahan. Ang unang asawa ay ang ating kaluluwa, madalas ito ang ating nakaliligtaan. Dahil abala tayo sa mga bagay sa mundong ito, ang kaluluwa natin ay kapos sa pagkalinga at pagkaing nararapat dito. Ang paghihirap, kalungkutan at daing nito ay hindi natin hinuha,at saka lamang natin mababatid ang halaga nito kapag tayo ay yayao na.


From the story "The king and the four wives"
Repost (tagalog version)
Jurey